Apr 042012
 

ಅಮೆರಿಕದ ಹಿರಿಯ ಕನ್ನಡಿಗರಲ್ಲಿ ಒಬ್ಬರಾದ ಡಾ|| ಎಚ್. ಕೆ. ಚಂದ್ರಶೇಖರ್ ಅವರೆ,

ತಮ್ಮ ಸಹಸ್ರಚಂದ್ರ ದರ್ಶನದ ಶುಭಸಂದರ್ಭದಲ್ಲಿ, ಕನ್ನಡ ಸಾಹಿತ್ಯ ರಂಗದ ಪರವಾಗಿ ನಮ್ಮ ಹಾರ್ದಿಕ ಶುಭಾಶಯಗಳನ್ನು ಕೋರಲು ನನಗೆ ಅತ್ಯಂತ ಆನಂದವೂ ಹೆಮ್ಮೆಯೂ ಆಗುತ್ತಿದೆ. ಸಾಹಿತ್ಯ ರಂಗ ಹುಟ್ಟಿದಾಗಿನಿಂದ ತಾವು ಅದರ ನಾಯಕತ್ವದ ಸಕ್ರಿಯ ಭಾಗವಾಗಿದ್ದೀರಿ. ರಂಗದ ಕಾರ್ಯಕಾರೀ ಸಮಿತಿಯ ಉಪಾಧ್ಯಕ್ಷರಾಗಿ, ಆಡಳಿತ ಮಂಡಲಿಯ ಅಧ್ಯಕ್ಷರಾಗಿ ಮತ್ತು ಸಂಪಾದಕ ಮಂಡಲಿಯ ಸದಸ್ಯರಾಗಿ ನಮಗೆಲ್ಲಾ ತಮ್ಮ ಮುಂದಾಳತ್ವವನ್ನು ನೀಡಿದ್ದೀರಿ. ಸಾಹಿತ್ಯ ರಂಗ ಈವರೆಗೆ ನಡೆಸಿರುವ ಪ್ರತಿಯೊಂದು ಸಮ್ಮೇಳನದಲ್ಲೂ ಸಕ್ರಿಯವಾಗಿ ಭಾಗವಹಿಸಿ ನಮಗೆ ಮಾರ್ಗದರ್ಶನ ನೀಡಿದ್ದೀರಿ. ರಂಗದ ಕಾರ್ಯಚಟುವಟಿಕೆಗಳಿಗೆ ಬೇಕಾದ ಹಣವನ್ನು ಶೇಖರಿಸುವಲ್ಲಿ ತಾವು ಮಾಡಿರುವ ಸಹಾಯ ಅತ್ಯಮೂಲ್ಯವಾದುದು, ಜೊತೆಗೆ ತಾವೂ ತಮ್ಮ ಶ್ರೀಮತಿಯವರೂ ಸೇರಿ ಮಾಡಿರುವ ವೈಯಕ್ತಿಕ ಧನಸಹಾಯವನ್ನು ನಾವು ಮನಸಾರೆ ಕೃತಜ್ಞತೆಯಿಂದ ಈ ಸಂದರ್ಭದಲ್ಲಿ ನೆನೆಯುತ್ತೇವೆ.

ಕನ್ನಡ ಸಾಹಿತ್ಯ ರಂಗವೇ ಅಲ್ಲದೇ ನ್ಯೂಯಾರ್ಕ್ ಕನ್ನಡ ಕೂಟದ ಮೂಲಕ ತಾವು ಮಾಡಿರುವ ನಾಲ್ಕು ದಶಕಗಳಿಗೂ ಮೀರಿದ ಕನ್ನಡ ಸೇವೆ ಅಮೆರಿಕದ ಕನ್ನಡಿಗರ ಚರಿತ್ರೆಯಲ್ಲಿ ಪ್ರಮುಖವಾದ ಸ್ಥಾನವನ್ನು ಗಳಿಸಿದೆ. ಅಮೆರಿಕದಲ್ಲಿ ಮೊದಲ ಬಾರಿಗೆ ಕನ್ನಡ ಸಮ್ಮೇಳನಗಳನ್ನು ಆಚರಿಸುವ ಯೋಜನೆಯನ್ನು ಪರಿಕಲ್ಪಿಸಿದವರು ನೀವು. ಆಚಾರ್ಯ ಎ.ಎನ್. ಮೂರ್ತಿರಾಯರ ‘ಪೂರ್ವಸೂರಿಗಳೊಡನೆ’ ಪುಸ್ತಕವನ್ನು ನ್ಯೂ ಯಾರ್ಕ್ ಕನ್ನಡ ಕೂಟದ ಮೂಲಕ ಪ್ರಕಟಿಸಿ ಇಲ್ಲಿನ ಕನ್ನಡ ಸ೦ಸ್ಥೆಗಳು ಸಾಹಿತ್ಯ ಕ್ಷೇತ್ರದಲ್ಲಿ ಎಷ್ಟು ಮೌಲಿಕವಾದ ಕೆಲಸ ಮಾಡಬಹುದೆ೦ದು ತೋರಿಸಿಕೊಟ್ಟಿರಿ. ಸ್ವತಃ ಅನೇಕ ಲೇಖನಗಳನ್ನು ಬರೆದಿರುವುದಲ್ಲದೆ, ನೀವು ಭಾಷಾ೦ತರಿಸಿದ ‘ಭಾರತದ ಬೃಹತ್ ಬೇಲಿ’ ಪುಸ್ತಕದ ಮೂಲಕ ಬ್ರಿಟಿಷ್ ವಸಾಹತುಶಾಹಿ ಚರಿತ್ರೆಯ ಮರೆತುಹೋದ ಒ೦ದು ಪರಿಚ್ಛೇದವನ್ನು ಮತ್ತೆ ನಮ್ಮ ಕಣ್ಣೆದುರಿಗೆ ಇರಿಸಿದಿರಿ. ಗಾ೦ಧಿಯನ್ನು ನ್ಯೂ ಯಾರ್ಕ್ ಜನರ ಕಣ್ಣ ಮು೦ದೆ ತ೦ದಿಟ್ಟಿರಿ. ಕನ್ನಡಿಗರು ಮಾತ್ರವಲ್ಲದೆ, ಇಡೀ ಭಾರತೀಯ ಸಮಾಜವನ್ನೂ ದಾಟಿ ಒಟ್ಟಿನಲ್ಲಿ ಇಲ್ಲಿನ ಅಮೆರಿಕನ್ ಸಮಾಜಕ್ಕೂ ವಿಶಿಷ್ಟ ರೀತಿಯಲ್ಲಿ ಸೇವೆ ಸಲ್ಲಿಸಿದ್ದೀರಿ. ವೈದ್ಯಕೀಯ ಕ್ಷೇತ್ರದಲ್ಲಿ ಅಮೂಲ್ಯ ಕೊಡುಗೆಯನ್ನು ಮಾಡುವುದರ ಮೂಲಕ ತಾವು ಸಲ್ಲಿಸಿರುವ ಸೇವೆಯ ಜೊತೆ ಜೊತೆಗೇ ಕನ್ನಡ ಮತ್ತು ಕನ್ನಡಿಗರ ಬಗ್ಗೆ ತಾವು ತೋರಿರುವ ಕಾಳಜಿ ಗಮನಾರ್ಹವಾದುದು. ತಮ್ಮ ಕನ್ನಡಸೇವೆ ಇದೇ ರೀತಿ ಮುಂದುವರೆಯಲಿ. ಕನ್ನಡ ಸಾಹಿತ್ಯ ರಂಗದ ಚಟುವಟಿಕೆಗಳ ಬಗ್ಗೆ ಹಿಂದೆ ತೋರಿರುವ ವಿಶ್ವಾಸ ಮತ್ತು ಕಾಳಜಿಯನ್ನು ಮುಂದೆಯೂ ತೋರಬೇಕೆಂದು ರಂಗದ ಪರವಾಗಿ ಕೇಳಿಕೊಳ್ಳುತ್ತೇನೆ. ತಾವು ಎಂಬತ್ತು ದಾಟಿರುವ ಈ ಸಂದರ್ಭದಲ್ಲಿ ಭಗವಂತನು ನಿಮಗೂ ನಿಮ್ಮ ಕುಟುಂಬದವರಿಗೂ ಆಯುರಾರೋಗ್ಯಗಳನ್ನು ದಯಪಾಲಿಸಲೆಂದು ಬೇಡುತ್ತಾ ಈ ನನ್ನ ಪತ್ರವನ್ನು ಮುಗಿಸುತ್ತೇನೆ.

ಇಂತು,
ತಮ್ಮವನೇ ಆದ

ಮೈ.ಶ್ರೀ. ನಟರಾಜ

 Posted by at 6:42 PM

  One Response to “ಡಾ|| ಎಚ್. ಕೆ. ಚಂದ್ರಶೇಖರ್ ಅವರಿಗೆ ಅಭಿನಂದನಾ ಪತ್ರ”

  1. aatmeeyate mydumbikondiruva sogasada lekhana idu. nimagoo hrithpoorna abhinandanegalu.
    ananthu
    (HKC’s brother in california)

 Leave a Reply

You may use these HTML tags and attributes: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>

(required)

(required)